Կոռուպցիայի դեմ պայքարն իհարկե հռչակված է, սակայն կոռուպցիան միայն կաշառակերությունը չէ, կոռուպցիան նաև սխալ, կամայակական, առանց մրցույթի նշանակումներն են, առանց հետագիծ ունեցող մարդկանց պատասխանատու ոլորտներում նշանակումներն են և վերջիններիս կողմից կայացրած որոշումները, որոնք բազմաթիվ օրինախախտումներով են ուղեկցվում: Այս մասին լրագրողների հետ զրույցում հայտարարեց տնտեսագետ Թաթուլ Մանասերյանը:
Տնտեսագետը նշեց, որ ինքը համբերատար կերպով սպասել է և նույնիսկ քայլ է արել համագործակցելու, չափորոշիչներ մշակելու մյուս գիտնականների հետ, որպեսզի գիտությունը հնարավորություն ունենա օբյեկտիվ ու անաչառ զարգանալու. «Այդ ամեն ինչը ոչ միայն տեղի չի ունեցել, այլ նաև կոպտորեն խախտվում և Սահմանադրությունը, և օրենքները: Ամբողջ գիտության համակարգն այսօր ողբալի վիճակում է: Եթե Հայաստանն ունի մտավոր կարողության մասով մրցակցային ներուժ ու եթե մենք այսպես ենք վերաբերվում գիտությանը, չեմ կարծում թե շոշափելի հաջողություն կունենանք: Այս միջավայրն անընդունելի է ինձ համար»:
Մանասերյանի խոսքերով, այսօր Հայաստանում չկա տեսլական, թե ուր ենք գնում, ինչն արդեն տնտեսական սպառնալիք է, և տնտեսական անվտանգությունն այսօր լուրջ խնդիր է Հայաստանի համար:
Տնտեսագետի կարծիքով, որոշումներ կայացնելուն պետք է մասնակից լինի քաղաքացիական հասարակությունը, հակառակ դեպքում նոր Հայաստան կերտելու բոլորի ջանքերը վտանգված են:
Բանախոսը չմոռացավ նաև խոսել պարգևավճարների մասին՝ հայտարարելով, որ դեմ չէ դրանց, քանի որ արժանիները պետք է խրախուսվեն, սակայն դրա համար չափորոշիչներ են պետք. «Եթե համատարած են պարգևատրում, ինձ մոտ հարց է առաջանում՝ միգուցե կան մարդիկ, ովքեր ավելիին են արժանի, կամ կան մարդիկ, ովքեր սուրճ խմողներ են»:
