Google ինտերնետ հսկան տուգանվել է Իսպանիայում` անձնական տեղեկատվության գաղտնիության մասին օրենքների խախտման համար, հայտնում է The Wall Street Journal-ը:
Տվյալների պաշտպանության իսպանական գործակալությունը Google-ին տուգանել է 900 հազար եվրոյով` նկատի ունենալով 3 օրենքի խախտում: Պարզվել է` ընկերությունը տվյալներ է հավաքում օգտատերերի մասին, միավորում է մի քանի սերվերներից հավաքված տվյալները և, առանց օգտատերերի գիտության, անորոշ ժամանակով պահում այդ տվյալները:
Google-ի ներկայացուցչի խոսքով` ընկերությունն ուսումնասիրում է հետաքննության արդյունքները, որպեսզի ըստ այդմ որոշի իր հետագա անելիքը: Համագործակցությունը գործակալության հետ կշարունակվի:
Google-ի դեմ տուգանային պատժամիջոցների հնարավորության մասին հայտնել են նաև Նիդեռլանդները, Իտալիան և Գերմանիան: