Միացյալ Նահանգները Ժնև է գործուղում բարձրաստիճան երկու պաշտոնյայի՝ Իրանի վիճահարույց միջուկային ծրագրի շուրջ հազվադեպ տեղի ունեցող ուղիղ բանակցություններ անցկացնելու նպատակով, հաղորդում է «Ամերիկայի Ձայն»-ի հայալեզու ծառայությունը:
Իրանի պաշտոնյաների հետ Ժնևում երկուշաբթի և երեքշաբթի օրերին հանդիպումներ են անցկացնելու ԱՄՆ-ի փոխարտգործնախարար Ուիլյան Բերնսը և Իրանի հետ անցկացվող բանակցություններում ԱՄՆ-ի գլխավոր բանագնաց, ԱՄՆ-ի արտգործնախարարի քաղաքական հարցերով տեղակալ Ուենդի Շերմանը:
Իրանի միջուկային հարցերով գլխավոր բանագնաց Աբաս Արաքչին, հանդես գալով կիրակի օրը Իրանի հեռուստատեսությամբ, ասել է, որ Միացյալ Նահանգների պաշտոնյաների հետ երկուշաբթի օրը կայանալիք հանդիպմանը մասնակցելու է նաև Եվրոպական Միության արտաքին քաղաքականության ղեկավարի տեղակալ Հելգա Շմիդտը:
Արաքչիի համաձայն, հանդիպման ընթացքում քննարկում է ծավալվելու Իրանի միջուկային ծրագրի պատճառով այս երկրի նկատմամբ Արևմուտքի կողմից ընդունված պատժամիջոցների շուրջ:
