Վիեննայի «Կոբուրգ» հյուրանոցում հունիսի 18-ին տեղի են ունենում Իրանի արտաքին գործերի փոխնախարար Աբաս Արաքչիի և Եվրամիության գերագույն ներկայացուցչի տեղակալ Հելգա Շմիդտի կոնսուլտացիաները՝ միջազգային միջնորդների «վեցնյակի» և Թեհրանի բանակցությունների հինգերորդ փուլի շրջանակներում:
Ինչպես ՌԻԱ Նովոստիին հայտնել Է բանակցություններին մոտ կանգնած մի աղբյուր, ավելի ուշ բանակցություններին պետք Է միանան միջազգային միջնորդների «վեցյակի» (Ռուսաստան, ԱՄՆ, Մեծ Բրիտանիա, Չինաստան, Գերմանիա և Ֆրանսիա) քաղաքական տնօրենները:
Իր հերթին, ԱՄՆ-ի պատվիրակության աղբյուրը հունիսի 18-ին հայտարարել Է, որ օրվա ընթացքում բանակցությունների շրջանակներում կկայանան «մի քանի համակարգող հանդիպումներ, ինչպես նաև արտահերթ կոնսուլտացիաներ»:
Նախօրյակին Իրանի պատվիրակության ղեկավար, Իսլամական Հանրապետության ԱԳ փոխնախարար Աբաս Արաքչին հույս Է հայտնել, որ հունիսի 18-ին կողմերը ձեռնամուխ կլինեն համապարփակ համաձայնագրի տեքստը գրելուն, որը կերաշխավորի իրանական միջուկային ծրագրի բացառապես խաղաղ բնույթը: Ըստ ավելի վաղ ձեռք բերված համաձայնությունների՝ կողմերը պետք Է գործընթացն ավարտեն մինչև հուլիսի 20-ը, ինչի կապակցությամբ Էլ շատերը Վիեննայում բանակցությունների ներկայիս հինգերորդ փուլը վճռորոշ են համարում, հաղորդել Է ՌԻԱ Նովոստին:
