Ռուսաստանի և Ուկրաինայի նախագահներ Վլադիմիր Պուտինը և Պյոտր Պորոշենկոն հեռախոսազրույցի ընթացքում քննարկել են Ուկրաինայի արևելքի իրադրությունը: Այդ մասին հաղորդել են նրանց մամուլի ծառայությունները:
«Վլադիմիր Պուտինը կարևորել է կրակի դադարեցումը Ուկրաինայի հարավ-արևելքի կոնֆլիկտային գոտիներում՝ հակամարտության կենսունակ կարգավորման հասնելու նպատակով»,- ասել է Պուտինի մամուլի քարտուղար Դմիտրի Պեսկովը:
Պորոշենկոն նշել է պատանդներին ազատելու և ուկրաինա-ռուսական սահմանի հսկողության արդյունավետ ռեժիմ հաստատելու անհրաժեշտությունը: Նա ասել է, որ հրադադարի հետ մեկտեղ աջակցություն է ակնկալում իր խաղաղ ծրագրին:
Ինչպես ընդգծում է Ուկրաինայի նախագահի մամուլի ծառայությունը, Պուտինն աջակցություն է հայտնել Դոնեցկի և Լուգանսկի մարզերում իրադրության ապաէսկալացմանն ուղղված ջանքերին:
Հունիսի 19-ին ավելի վաղ Պուտինը հեռախոսազրույց է ունեցել Գերմանիայի կանցլեր Անգելա Մերկելի և Ֆրանսիայի նախագահ Ֆրանսուա Օլանդի հետ:
