Չինական պետական ԶԼՄ-ները Apple-ի սմարթֆոն iPhone-ն անվանել են ազգային անվտանգությանը սպառնացող սարք՝ որպես հիմք բերելով վերջինիս օգտատերերի տեղաշարժմանը հետևելու կարողությունները: Այս մասին հայտնում է Reuters գործակալությունը:
CCTV հեռուստաընկերության պատրաստած ռեպորտաժի ժամանակ քննադատվել է iPhone-ի «Frequent Locations» գործառույթը: Եթե այն ակտիվ է, ապա այն ֆիքսում է օգտատերի գտնվելու վայրը և տվյալ վայրում գտնվելու ժամանակը:
Սմարթֆոնը հիշում է այն վայրերը, որտեղ հաճախ այցելում է օգտատերը, ինչի արդյունքում iPhone-ը կարող է հստակ որոշել օգտատիրոջ բնակության հասցեն, աշխատավայրը, ռեստորանները և բոլոր այն վայրերը, որտեղ օգտատերը սիրում է ժամանակ անցկացնել:
«Սրանք շատ անձնական տվյալներ են», - նշել է հրավիրված փորձագետը: Նրա խոսքով, այս տվյալների բազային մուտքի հնարավորություն ունենալու դեպքում, կարելի է պարզել ինչպես երկրի տնտեսական վիճակը, այնպես էլ «բացահայտել երկրի պետական գաղտնիքները»: Apple-ի ներկայացուցիչները դեռևս չեն մեկնաբանել այս հայտարարությունը:
Apple ընկերությունն արդեն մի քանի անգամ քննադատվել է չինական ԶԼՄ-ների կողմից՝ նախկինում մեղադրում էին ընկերությանը ԱՄՆ հատուկ ծառայություններին տվյալներ տրամադրելու համար:
Սակայն Apple-ը միակ տեխնոլոգիական ընկերությունը չէ, որ չինական շուկայում նման դժվարությունների է հանդիպում: Չինաստանում մշտապես արգելվում է Google-ը, արգելված են Facebook և Twitter սոցցանցերը, իսկ պետական կառույցներին արգելված է օգտագործել Microsoft-ի Windows 8 օպերացիոն համակարգով աշխատող նոր համակարգիչներ օգտագործելը: