Իսրայելի արտաքին գործերի նախարար Ավիգդոր Լիբերմանը հրահանգել է նոտա հղել Անկարային` Թուրքիայում գտնվող իսրայելցի` դիվանագիտական առաքելությունների աշխատակիցների անվտանգությունը պատշաճ կերպով չապահովելու համար:
Ինչպես հաղորդում է թուրքական CNNTurk հեռուստաալիքը, այս մասին ԶԼՄ-ներին հայտնել է Իսրայելի ԱԳՆ խոսնակ Յիգալ Պալմորը: Նրա խոսքով` դա պայմանավորված է Գազայի իրադարձությունների հետ կապված Թուրքիայում Իսրայելի դեմ անցկացվող զանգվածային ցույցերով, որոնց մասնակիցները հարձակումներ են գործում Թուրքիայի տարբեր քաղաքներում Իսրայելի դիվանագիտական ներկայացուցչությունների վրա:
Պալմորը նշել է, որ Իսրայելը որոշել է նաև զգալիորեն նվազեցնել Թուրքիայում գտնվող իր դիվանագիտական անձնակազմի թիվը:
Թուրքական հեռուստաալիքը հայտնել է, որ Լիբերմանը Թուրքիայում գտնվող դիվանագետներին կարգադրել է իրենց ընտանիքներին վերադարձնել հայրենիք: