Իրանի հոգևոր առաջնորդ այաթոլլա Ալի Խամենեին Պաղեստինի ժողովրդին կոչ է արել շարունակել ռազմական գործողություններն Իսրայելի դեմ և ընդլայնել գործողությունների գոտին, տեղեկացնում է IRNA գործակալությունը:
«Այդ սիոնիստական դաժան ռեժիմի դեմ պայքարի միակ միջոցը դիմադրության շարունակումն ու ռազմական գործողությունների գոտու ընդլայնումն է՝ մինչև Հորդանան գետի Արևմտյան ափ»,-հայտարարել է նա:
Ավելի վաղ Իրանի իշխանություններն իսլամական աշխարհին կոչ էին արել ակտիվ դիրք զբաղեցնել Գազայի հատվածի բնակչությանն օգնելու հարցում, որը տուժել է Իսրայելի հրթիռակոծությունների հետևանքով:
Հիշեցնենք, որ հուլիսի 17-ին Իսրայելի բանակը ցամաքային գործողություն էր սկսել Գազայում: Մինչ այդ 10 օր շարունակ Իսրայելի բանակի ռազմածովային ուժերը հարվածներ էին հասցրել Գազայի օբյեկտներին: