Պաղեստինյան ՀԱՄԱՍ խմբավորման եւ Իսրայելի միջեւ գործող հրադադարի մասին համաձայնագիրը երկարաձգվել է եւս մի քանի օրով: «ԻՏԱՌ ՏԱՍՍ»-ի փոխանցմամբ՝ այս մասին օգոստոսի 6-ին տեղեկացրել է «Ալ Արաբիա» հեռուստաալիքը:
Հրադադարի ռեժիմը երկարացնելու մասին պայմանավորվածությունը ձեռք է բերվել Եգիպտոսի միջնորդությամբ:
Նշենք, որ ներկայում հակամարտող կողմերի միջեւ 72-ժամյա հրադադարի ռեժիմ է գործում, որն ուժի մեջ է մտել օգոստոսի 5-ին, ժամը 08:00-ից: Իսրայելն իր զորքերն ամբողջությամբ դուրս է բերել Գազայի հատվածից:
Եգիպտական լրատվամիջոցների տեղեկատվության համաձայն, առաջիկայում իսրայելական պատվիրակությունը պետք է Եգիպտոսի արտաքին հետախուզական ծառայության միջոցով պատասխան փոխանցի պաղեստինցիների առաջադրած պահանջներին:
