Հեռախոսազրույց է կայացել Եվրոպայի խորհրդի գլխավոր քարտուղար Թորբյորն Յագլանդի եւ Ադրբեջանի նախագահ Իլհամ Ալիեւի միջեւ: Զրույցի արդյունքում Յագլանդը հանդես է եկել հայտարարությամբ, որում խոր անհանգստություն է հայտնել ադրբեջանցի իրավապաշտպանների կալանավորման փաստով:
«Ադրբեջանի նախագահի հետ հեռախոսազրույցում ես խոր անհանգստություն եմ հայտնել` վերջին օրերին հայտնի իրավապաշտպանների ձերբակալութունների կապակցությամբ:
Մենք պայմանավորվել ենք աշխատանքային խմբի գործունեությունը վերսկսելու մասին, որը բաղկացած էր նախագահի աշխատակազմի եւ քաղաքացիական հասարակության ներկայացուցիչներից: Այն ստեղծվել էր 2003 թ. եւ գործել մինչեւ 2008 թ.: Աշխատանքային խմբի գործունեությունը կվերսկսվի՝ դրա կազմում Եվրոպայի խորհրդի ներկայացուցիչների մասնակցությամբ:
Այդ կառույցի վերականգնումը տեղի կունենա հնարավորինս արագ եւ լավ հնարավորություն կլինի իրավապաշտպանների դեմ առաջադրված մեղադրանքներն ստուգելու, ինչպես նաեւ իշխանությունների եւ քաղաքացիական հասարակության միջեւ երկխոսություն սկսելու համար», - ասվում է հայտարարությունում:
