Ուկրաինայի ԱԳՆ-ն հայտարարել է, որ ՌԴ նախագահ Պուտինի և Պետդումայի պատգամավորների մոտալուտ այցը Ղրիմ անթույլատրելի և անընդունելի է: Դրա մասին հայտարարել է РБК-Украина-ն:
«Դա անթույլատրելի և անընդունելի է: Ղրիմն անօրինականորեն օկուպացված է: ՌԴ ղեկավարության այցը Ղրիմ անընդունելի է, դա ուկրաինական արտաքին գործերի նախարարության հստակ և միանշանակ դիրքորոշումն է», - հայտարարել է ԱԳ փոխնախարար Դանիիլ Լուբկիվսկիյը:
Ռուսական ղեկավարության այցը Ղրիմ նախատեսվում է օգոստոսի 14-ին: Պուտինը պատրաստվում է ելույթ ունենալ խորհրդարանի և նախարարների առջև:
Մայիսի 15-ին Ուկրաինայում օրենք ընդունվեց, որով կարգավորվում է Ղրիմի և Սևաստոպոլի ստատուսը, նրանց օդային տարածքները, ինչպես նաև Ուկրաինայի ներքին ջրային և ծովային տարածքները՝ որպես ժամանակավորապես օկուպացված տարածաշրջան:
Հիշեցնենք, որ Ղրիմը վերամիավորվել է ՌԴ-ին 2014-ի մարտի 18-ին՝ հանրաքվեի արդյունքում:
