Գերմանիայի հետախուզական ծառայությունը ձայնագրել է Հիլարի Քլինթոնի զրույցը օդանավում, երբ վերջինս պետքարտուղար էր և թռչում էր կառավարական օդանավով։
Քլինթոնի զրույցը պատահաբար է ձայնագրվել և լրտեսական որևէ ծրագրի մաս չի հանդիսանում։ Այն, որ ձայնագրությունն իսկույն չէր ոչնչացվել, «ապուշություն էր», կարծում է աղբյուրներից մեկը, հայտնում է Reuters-ը՝ վկայակոչելով գերմանական լրատվամիջոցները։
Մամուլը նաև պարզել է, որ փաստաթղթերի համաձայն՝ Գերմանիայի կառավարությունը դաշնային հետախուզական ծառայությանը հանձնարարել է լրտեսել ՆԱՏՕ-ի անդամ գործընկեր մի երկրի։ Թե հատկապես որ երկրին, չի նշվում, հայտնում է «Ռոսբալտը»։
Հիշեցնենք, հուլիսին Գերմանիայում միանգամից երկու լրտեսական սկանդալ էր եղել, որից անմասն չէին ամերիկյան հատուկ ծառայությունները։
