Օգոստոսի 17-ին կայացել է ինքնահռչակ «Դոնեցկի Ժողովրդական Հանրապետության» նախագահության խորհրդի նիստը: Ընդունվել է երկու որոշում՝ «ԴԺՀ-ի ռազմանավերի մասին դրույթների հաստատելու» եւ «Քրեական օրենսգիրքը հաստատելու մասին», որը պատիժներ է սահմանում զինվորական հանցագործությունների համար, ընդհուպ գերագույն պատիժ (գնդակահարություն):
«Գաղտնիք չէ, որ մենք հանցագործություններ կատարող զինծառայողներ ունենք: Կան կողոպուտի, բռնություն կիրառելու փաստեր: Այդ պատճառով էլ ռազմական արդարադատության մարմինների ստեղծումը պետք է լինի առաջնահերթ խնդիրներից», - հայտարարել է ԴԺՀ-ի գլխավոր դատախազ Էդուարդ Յակուբովսկին:
Ինչ վերաբերում է ԴԺՀ-ի Քրեական օրենսգրքի մշակմանը, ապա նրա հիմքը ՌԴ կանոնակարգն է: Ընդ որում` օրեսնդրությունը մահապատիժ է նախատեսում ծանր հանցագործությունների համար:
«Երբ պատերազմն ավարտենք, մենք կգնանք մեր քրեական օրենսդրությունը հումանիզացնելու ճանապարհով», ասել է ԴԺՀ-ի փոխվարչապետ Ալեքսանդր Կարամանը:
ԴԺՀ-ի առաջին փոխվարչապետ Վլադիմիր Անտյուֆեեւն ընդգծել է, որ մահապատժի կիրառումը վրեժ չէ, այլ սոցիալական պաշտպանության բարձրագույն աստիճան:
«Մենք պետք է տուժածի, նրա հարազատների կողմից լինենք: Մենք պարտավոր ենք պաշտպանել ժողովրդին», - հայտարարել է փոխվարչապետը: