«Փաստ» թերթը գրում է. «Տևական ժամանակ է՝ «Հյուսիս-հարավ» ավտոմայրուղու հետ կապված ոչ մի նոր զարգացում ու տեղաշարժ չկա. Իշխանությունների այն հայտարարությունները, որ այնտեղ տարիներ ի վեր տեղի են ունեցել զանգվածային չարաշահումներ ու յուրացումներ, թվում է, մղվել են երրորդական պլան: Սակայն ոչ պակաս ծանր է աշխատողների վիճակը:
«Փաստ» թերթի տեղեկություններով՝ ճանապարհի շինաշխատանքներ իրականացրած ՍՊԸ-ների աշխատակիցները չեն ստացել իրենց մոտ 7-8 ամսվա աշխատավարձը և բողոքի հերթական ցույցին են նախապատրաստվում: Նրանք հատկապես անհանգստացած են, որ իշխանությունները հարցին նայում են մատների արանքից և ամեն բան բարդում երբեմնի պատասխանատուների վրա՝ մոռանալով, որ մոտ 1,5 տարի է՝ իշխանության են եկել, այնինչ ոչ միայն կոնկրետ քայլեր այս ուղղությամբ չեն արվել, այլև լուծումները, կարծես, չեն էլ երևում:
Ի դեպ՝ «Հյուսիս-հարավ»-ի շինաշխատանքներն, աշխատակիցների փոխանցմամբ, ընթանում են բավականին դանդաղ և նախատեսված ժամկետներում մայրուղին միանշանակ չի հանձնվի շահագործման»:
Մանրամասն՝ թերթի այսօրվա համարում
