Անկարայում մեկնարկել է Թուրքիայի նորընտիր նախագահ Ռեջեփ Թայիփ Էրդողանի երդմնակալության արարողությունը: Նա երդում է տվել նախագահի պաշտոնում:
Արարողությանը ներկա են ինը տասնյակ երկրների ներկայացուցիչներ: Առնվազն տասնհինգ երկիր ներկայացված է ամենաբարձր՝ նախագահների կամ երկրների ղեկավարների մակարդակում: Այդ թվում՝ Ալբանիան, Բենինը, Բոսնիա-Հերցեգովինան, Բուլղարիան, Եթովպիան, Կատարը, Ղազախստանը, Հյուսիսային Կիպրոսը, Կոսովոն, Մակեդոնիան, Մոլդովան, Սոմալին, Տոգոն, Թուրքմենստանը:
Քառասուն երկիր ներկայացված է տարբեր նախարարների մակարդակում: Հայաստանը ևս արարողությանը ներկայացված է արտգործնախարարության մակարդակում՝ ի դեմս Էդվարդ Նալբանդյանի: Վերջինիս Hurriyet-ն «անակնկալ հյուր» է որակում:
Հայտնի է, որ ԱՄՆ-ն ներկայացված է անհավանական ցածր՝ ԱՄՆ-ի գործերի հավատարմատարի մակարդակում:
Hurriyet-ը հայտնում է, որ արարողությունը բոյկոտել է Թուրքիայի ընդդիմության առաջնորդ Քըլըչդարօղլուն:
Հայտնի է դարձել, որ նախկին նախագահ Աբդուլլահ Գյուլն էլ արարողությունից անմիջապես հետո Անկարայից կմեկնի Ստամբուլ, որտեղ պատրաստվում է բնակվել:
Վերջին պահին այս արարողությանն իրենց այցերը հետաձգել են Ուկրաինայի նախագահ Պյոտր Պորոշենկոն և Պակիստանի վարչապետ Նավազ Շարիֆը: Երկու դեպքում էլ պատճառը երկրների ներքին դրությունն է:
