Այսօրվանից ուժի մեջ է մտել Ադրբեջանի և Եվրամիության միջև պարզեցված վիզայի մասին համաձայնագիրը, հայտնում են ադրբեջանական ԶԼՄ-ները՝ վկայակոչելով Բաքվում ԵՄ-ի գրասենյակը:
Նմանապես ուժի մեջ է մտել նաև ռեադմիսիայի մասին համաձայնագիրը, որով որևէ երկիր պարտավորվում է հետ ընդունել այլ երկրից արտաքսվող իր քաղաքացիներին, տվյալ դեպքում՝ ԵՄ-ի երկրներում ապօրինի բնակվող Ադրբեջանի քաղաքացիներին, որոնք ենթակա են արտաքսման:
Վիզային ռեժիմի մասին համաձայնագիրը ստորագրվել էր անցած տարի նոյեմբերին Վիլնյուսի գագաթաժողովի ժամանակ:
Համաձայնագրերին առնչվող բոլոր ներքին գործընթացները կատարված են: Փաստաթղթերում բացակայում են Մեծ Բրիտանիայի, Իռլանդիայի և Դանիայի ստորագրությունները:
Նոր կանոններով՝ վիզաներն ադրբեջանցիներին կտրվեն 10 օրվա, իսկ արտակարգ իրավիճակներում՝ 2 օրվա ընթացքում: Վիզայի ստացման վճարը կարժենա 35 եվրո: Վիզա ստանալու համար անհրաժեշտ փաստաթղթերի քանակը կկրճատվի: