ԱՄՆ-ի նախագահ Բարաք Օբամայի այցն Էստոնիա՝ ՆԱՏՕ-ի գագաթաժողովի նախօրեին, «հստակ ուղերձ է», հայտարարել է Էստոնիայի ԱԳ նախարար Ուրմաս Պայետը DW-ի հետ հարցազրույցում:
Դիվանագետը նշել է, որ վերջին ամիսներին ՆԱՏՕ-ի շնորհիվ տարածաշրջանում դրական փոփոխություններ են տեղի ունեցել. օրինակ՝ Էստոնիայի Էմարի ռազմական օդանավակայանն այժմ դաշինքի առաքելության անբաժանելի մասն է: Պայետը ցանկություն է հայտնել անփոփոխ պահել ՆԱՏՕ-ի գոյություն ունեցող միջոցները եւ նշել է հավելյալ «որոշակի» քայլերի անհրաժեշտությունը՝ բալթյան երկրներին աջակցելու համար:
Էստոնիայի արտգործնախարարը նաեւ հավելել է, որ չի կարող հաստատել ՆԱՏՕ-ի՝ Արեւելյան Եվրոպայում հինգ նոր ռազմաբազա տեղակայելու ծրագրերի մասին լուրերը:
Անդրադառնալով Ուկրաինայի ճգնաժամում Ռուսաստանի գործողություններին՝ Էստոնիայի արտգործնախարարը նշել է, որ հաշվի առնելով «ռուսական ներխուժումն Ուկրաինա», կարելի է եզրակացնել, որ Մոսկվայի համար այլեւս կարեւոր չեն 1975 թ. Հելսինկիյան համաձայնությունները եւ 1997 թ. ՆԱՏՕ-ի եւ ՌԴ-ի միջեւ Համագործակցության վերաբերյալ հիմնարար պայմանագիրը: Ակնհայտ է, որ միջազգային անվտանգության սպառնալիքի մակարդակը փոխվել է՝ Ուկրաինայում ՌԴ գործողությունների հետ կապված, ընդգծել է Պայետը:
