Առանց ՄԱԿ-ի որոշման ԱՄՆ-ի՝ Սիրիային օդային հարվածներ հասցնելը Մոսկվան կգնահատի որպես ագրեսիայի դրսևորում, հայտնում է «Газета.Ru»-ն:
Այս հայտարարությունը Ռուսաստանի արտգործնախարարությունից հնչել է ԱՄՆ-ի նախագահ Բարաք Օբամայի այն հայտարարության ֆոնին, թե ԱՄՆ-ն պատրաստ է հարվածներ հասցնել Սիրիայում «Իսլամական պետություն» խմբավորման դիրքերին:
Ռուսական կողմն ընդգծում է, որ Վաշինգտոնը պատրաստ է դա անել առանց Սիրիայի «օրինական»՝ գործող իշխանությունների համաձայնության: Ռուսաստանը նման քայլի հավանականությունը միջազգային իրավունքի կոպտագույն խախտում է որակում:
Մոսկվան հիմքեր ունի կարծելու, որ այդ դեպքում հարվածի տակ կհայտնվեն նաև սիրիական կառավարական ուժերը, ինչն է՛լ ավելի կսրի հակամարտությունը Սիրիայում:
