Եգիպտոսի նախագահ Աբդել Ֆաթեհ աս-Սիսին հայտարարել է, որ միջազգային հակաահաբեկչական կոալիցիան չպետք է սահմանափակվի «Իսլամական պետություն» իսլամիստական խմբավորման դեմ պայքարով, այլ պետք է նաև համակարգված պայքար ծավալի առհասարակ համաշխարհային ահաբեկչության դեմ։
Ինչպես հաղորդում է «Ռոյթերս» լրատվական գործակալությունը, այս մասին Եգիպտոսի նախագահը հայտնել է Կահիրե ժամանած ԱՄՆ պետքարտուղար Ջոն Քերիին։ Եգիպտական հատուկ ծառայությունների տվյալներով՝ «Իսլամական պետությունը» կապ է հաստատել Եգիպտոսում ծայրահեղական համարվող «Անսար Բաիթ ալ-Մաքդիս» խմբավորման հետ։ Վերջինս բախումներում սպանել էր ավելի քան 100 ուժայինների 2013-ին նախագահ Մուհամեդ Մուրսիին գահընկել անելուց ի վեր։
Աս-Սիսիի խոսքերով՝ Եգիպտոսը կողջունի «Անսար Բաիթ ալ-Մաքդիս» խմբավորման դեմ ուղղված ցանկացած քայլ։ Ուշագրավ է, որ նախագահը կոչ է արել պայքար ծավալել նաև «Մուսուլման եղբայրներ» կազմակերպության դեմ, որն աս-Սիսիի նախագահ դառնալուց ի վեր՝ ահաբեկչական է ճանաչվել, և նրա անդամներից մեծ մասի դեմ մահապատիժ է սահմանվել։ Ինքը՝ Մուրսին, ևս ազատազրկված է, նրան մեղադրում են ահաբեկիչների հետ համագործակցելու, ոստիկանների ու զինծառայողների սպանելու և սպանելու հրաման տալու համար։
Աս-Սիսին նաև անհանգստություն է հայտնել «Իսլամական պետության» շարքերում արտասահմանից ժամանած զինյալների առկայությաբն առնչությամբ։ Ինչպես շեշտել է նախագահը, այդ զինյալները սովորաբար այս կամ այն եվրոպական երկրի անձնագիր ունեն, ուստի կարող են անարգել վերադառնալ, և վտանգ ներկայացնելով նույն այդ երկրների համար՝ անձնագրի շնորհիվ չեն ենթարկվի համապատասխան ստուգումների։
Ըստ աղբյուրի՝ Քերին էլ իր հերթին հավաստիացրել է, որ Եգիպտոսը խիստ նշանակալից դեր ունի «Իսլամական պետությանը» ու դրա գաղափարախոսությանը հակազդելու գործընթացում։
