Մեծ Բրիտանիայի վարչապետ Դևիդ Քեմերոնն ու Իրանի նախագահ Հասան Ռուհանին մտադիր են երկկողմ հանդիպում անցկացնել Նյու Յորքում տեղի ունեցող ՄԱԿ-ի Գլխավոր ասամբլեայի նստաշրջանի շրջանակներում:
Դա կլինի նման մակարդակով առաջին բրիտանա-իրանական հանդիպումը 1979 թվականից ի վեր: Այս մասին հայտնում է Interfax-ը՝ հղում անելով բրիտանացի վարչապետի մամլո ծառայությանը:
Վերլուծաբանների կարծիքով՝ Քեմերոնը իրանցի նախագահին կփորձի համոզել «Իսլամական պետություն» խմբավորման դեմ միջազգային կոալիցիայի գործողություններին միանալու անհրաժեշտության մեջ: Ավելի վաղ Իրանը հրաժարվել էր կոալիցիային մասնակցությունից:
Այն մասին, որ Իրանը կարող է ավելի ակտիվ դեր խաղալ խմբավորման դեմ պայքարում, երեկ Իրանի արտգործնախարար Մուհամմադ Ջավադ Զարիֆի հետ հանդիպմանը հայտարարել էր ԱՄՆ պետքարտուղար Ջոն Քերին:
