Ուկրաինան կարող է պահպանել իր տարածքային ամբողջականությունն ու միասնականությունը՝ միայն երկրի բոլոր քաղաքացիների իրավունքներն ապահովելու դեպքում, հայտարարել է ՌԴ նախագահ Վլադիմիր Պուտինը, գրում է РИА Новости-ն։
«Մենք հիմնվում ենք նրա վրա, որ բոլոր մարդիկ, որոնք ապրում են Ուկրաինայի ցանկացած անկյունում, պետք է օգտվեն լիարժեք իրավունքներից, որոնք նախատեսված են միջազգային իրավունքի նորմերով, ուկրաինական օրենսդրությամբ, ոչ ոք չի ենթարկվի խտրականության լեզվային, էթնիկ կամ կրոնական սկզբունքով»,- ասել է Պուտինը։
Նախագահը նշել է, որ միայն այդ դեպքում հնարավոր կլինի պահպանել երկրի տարածքային ամբողջականությունը, միայն այդպես կարելի է վերադառնալ միասնականությանը և ապահովել տնտեսական և սոցիալական ոլորտի զարգացումը։ «Մենք հույս ունենք, որ այդպես կլինի, և ամեն կերպ կնպաստենք դրան»,- ընդգծել է ՌԴ նախագահ Պուտինը։
