Ռուսական մամուլում հաղորդագրություն է հայտնվել, ըստ որի կարմիր ձկնկիթում նկատվել է աղիքային ցուպիկ՝ E. coli: Մանսագետները խորհուրդ են տվել ձեռնպահ մնալ ամանորին այն սեղաններին դնելուց, քանի որ աղիքային ցուպիկի բազմաթիվ դեպքեր են արձանագրել:
Analitik.am-ի հետ զրույցում ՀՀ Սննդի անվտանգության տեսչական մարմնի մամուլի պատասխանատու Անուշ Հարությունյանը հաղորդեց, որ կարմիր ձկնկիթ ներկրվում է Հայաստան, սակայն բողոքներ չեն ստացել:
«Այս հաղորդագրությունից հետո սահմանին կարմիր ձկնկիթի նկատմամբ հսկողությունը կուժեղացվի»,-ասաց նա:
Հարությունյանը նաև փոխանցեց, որ ներկրելուց, օրենքով սահմանված ընթացակարգերը պահվում են, իսկ կասկածների դեպքում ապրանքը գնում է լաբորատոր փորձաքննության:
ՀՀ ՍԱՏՄ ղեկավար Գեորգի Ավետիսյանն այս առնչությամբ նշել է, որ ԵԱՏՄ շրջանակներում գործում է միասնական տարածք և սահմանին այն չի ստուգվում:
Նշենք, որ 2019 թվականի հունվարի 1-ից մինչև դեկտեմբերի 23-ը Բելառուսից Հայաստան է ներկրվել 1118,4 կգ, Գերմանիայից 28,69 կգ, Իսլանդիայից 245878 կգ, Ռուսաստանից 256230,33 կգ ձկնկիթ:
Գոհար Ստեփանյան
