Ուկրաինայի նախագահ Պյոտր Պորոշենկոն, Եվրախորհրդի նախագահ Հերման Վան Ռյոմպյոյը եւ Եվրահանձնաժողովի նախագահ Ժոզե Մանուել Բառոզուն Միլանում կայացած հանդիպմանը նշել են Մինսկի համաձայնությունների կատարման անհրաժեշտությունը եւ ընդգծել, որ Ուկրաինայի եւ ԵՄ-ի էներգետիկական անվտանգության հարցի լուծումը համատեղ ջանքեր է պահանջում: Այդ մասին հաղորդվում է Պորոշենկոյի կայքում:
«Զրուցակիցները համաձայնել են, որ սեպտեմբերի 5-ի Մինսկի արձանագրության եւ սեպտեմբերի 19-ի Մինսկի հուշագրի բոլոր կետերը պետք է անշեղորեն կատարվեն, հատկապես հրադադարի ռեժիմի պահպանումը, սահմանների նկատմամբ հսկողությունը եւ պատանդների ազատումը»,- ասված է հաղորդագրության մեջ:
Զրուցակիցները նաեւ նշել են, որ Դոնբասում ընտրությունների անցկացումը լրջորեն կհարվածի Մինսկի համաձայնություններին:
Ավելի վաղ Պորոշենկոն Միլանում հանդիպում է ունեցել Գերմանիայի կանցլեր Անգելա Մերկելի, Իտալիայի նախագահ Ջորջո Նապոլիտանոյի եւ Իտալիայի վարչապետ Մատեո Ռենցիի հետ:
Մասնավորապես, ինչպես նշում Է ՌԻԱ Նովոստին, Մերկելի հետ հանդիպմանը կարեւորվել է ռուս-ուկրաինական սահմանում ԵԱՀԿ-ի առաքելության թվակազմի ավելացումը: Պորոշենկոն եւ Մերկելը նաեւ անհրաժեշտ են համարել Մինսկի համաձայնությունների ամբողջական կատարումը:
Ավելի վաղ Ուկրաինայի նախագահը ստորագրել է Դոնեցկի եւ Լուգանսկի մարզերի առանձին շրջանների հատուկ կարգավիճակի մասին օրենքը: «Օրանքով նշված տարածքներում հատուկ կարգը սահմանվում է ժամանակավորապես՝ երեք տարով»,- ասված է պետության ղեկավարի կայքում զետեղված հաղորդագրության մեջ:
Նշվում է, որ օրենքի հիմնական նպատակը Դոնբասի իրադրության նորմալացման եւ բնակիչների վերադարձի համար պայմանների ստեղծումն է:
Բացի այդ պետությունը չի հետապնդելու եւ քրեական պատասխանատվության չի ենթարկելու զինված կարգավորումների մասնակիցներին, բացառությամբ նրանց, ովքեր կասկածվում են ծանր հանցագործություններ կատարելու մեջ: