Մոսկվան Ուկրաինայի հարավ-արևելքում անցկացված ընտրությունները կայացած է համարել: Դոնբասում ընտրված ներկայացուցիչները մանդատ են ստացել շրջաններում նորմալ կյանքի վերականգնման վերաբերյալ գործնական խնդիրների լուծման համար, հայտարարել է Ռուսաստանի ԱԳՆ-ն, գրում է «Взгляд»-ը:
«Դոնեցկի և Լուգանսկի շրջաններում ընտրությունները տեղի են ունեցել հիմնականում կազմակերպված, ընտրողների բարձր մասնակցությամբ: Մենք հարգում ենք Հարավ-արևելքի բնակիչների կամարտահայտումը: Դոնբասում ընտրված ներկայացուցիչները մանդատ են ստացել շրջաններում նորմալ կյանքի վերականգնման վերաբերյալ գործնական խնդիրների լուծման համար»,- ասված է Արտաքին գործերի նախարարության հայտարարության մեջ:
Միևնույն ժամանակ, «Взгляд»-ի հաղորդմամբ, ԵՄ դիվանագիտության ղեկավար Ֆեդերիկա Մոգերինին հայտարարել է, որ Դոնբասում անցկացված ընտրությունները խոչընդոտում են Ուկրաինայում խաղաղության հաստատմանը:
ТАСС-ի հաղորդմամբ էլ՝ ՄԱԿ-ի գլխավոր քարտուղար Բան Կի Մունը կարծում է, որ նոյեմբերի 2-ին կայացած ընտրությունները մինսկյան պայմանավորվածությունների լուրջ խախտում են:
