Հայաստանի և Ադրբեջանի արտաքին գործերի նախարարներ Էդվարդ Նալբանդյանը և Էլմար Մամեդյարովը մինչև տարեվերջ կարող են նոր հանդիպում ունենալ ԵԱՀԿ Մինսկի խմբի համանախագահների մասնակցությամբ: Ինչպես հաղորդում է ադրբեջանական ԱՊԱ գործակալությունը, այս մասին լրագրողների հետ զրույցում հայտնել է Ադրբեջանի արտգործնախարարը:
Մամեդյարովը դրական է գնահատել Փարիզում կայացած հանդիպումները, որոնք, ըստ նրա, կարևոր քայլ էին կարգավորման գործընթացին ընդառաջ: «Այս հակամարտությունը չի կարող կարգավորվել մեկ օրում: Մենք պետք է շարունակենք քննարկումներն այն հարցերի շուրջ, որոնք դեռ համաձայնեցված չեն: Ամենայն հավանականությամբ դեկտեմբերի սկզբին ԵԱՀԿ անդամ երկրների արտգործնախարարների հանդիպման շրջանակներում Բազելում կանցկացվի նաև հանդիպում ղարաբաղյան հիմնախնդրի հարցով: Մենք կխոսենք և քննարկումներ կունենանք: Հնարավոր է` մոտ ժամանակներս նախագահների հանդիպման անհրաժեշտություն առաջանա»,- նշել է Ադրբեջանի արտգործնախարարը:
Փարիզի Մարինյի պալատում հոկտեմբերի 27-ին ԼՂ հիմնահարցի կարգավորմանն ուղղված բանակցություններ էին տեղի ունեցել Հայաստանի, Ադրբեջանի և Ֆրանսիայի նախագահների, ինչպես նաև ԵԱՀԿ Մինսկի խմբի համանախագահների ու ԵԱՀԿ գործող նախագահի անձնական ներկայացուցիչ Անջեյ Կասպրշիկի մասնակցությամբ: Խաղաղ բանակցություններում առաջընթաց արձանագրելու համարհանդիպման մասնակիցները կարևորել էին ԵԱՀԿ Մինսկի խմբի համանախագահության շրջանակում երկխոսության շարունակումը և վստահության ամրապնդման ուղղությամբ ջանքերը: Ընդգծվել էր հակամարտության խաղաղ կարգավորման այլընտրանքի բացակայությունը: Պայմանավորվածություն էր ձեռք բերվել կողմերի միջև շարունակելու բարձր մակարդակի բանակցությունները:
