Ադրբեջանի նախագահ Իլհամ Ալիևի և Հայաստանի նախագահ Սերժ Սարգսյանի փարիզյան հանդիպման ընթացքում մեծ առաջընթաց չի գրանցվել, սակայն Ֆրանսիայի նախագահ Ֆրանսուա Օլանդի հայտարարությունն այն մասին, որ պետք է սկսել աշխատանքը մեծ խաղաղության համաձայնագրի վրա, արդեն իսկ առաջընթաց է: Այդ մասին այսօր կայացած ճեպազրույցի ընթացքում հայտարարել է Ադրբեջանի արտգործնախարար Էլմար Մամեդյարովը:
Ինչպես տեղեկացնում է ադրբեջանական Trend գործակալությունը, նախարարը նշել է, որ պետք է շարունակել աշխատանքներն այն հարցերի շուրջ, որոնք դեռևս չեն համաձայնեցվել:
Մամեդյարովը հիշեցրել է, որ դեկտեմբերի սկզբին Շվեյցարիայում կայանալու է ԵԱՀԿ արտգործնախարարների հավաքը, որի շրջանակներում նախատեսվում է ՀՀ-ի և Ադրբեջանի արտգործնախարարների հանդիպում՝ ԵԱՀԿ Մինսկի խմբի համանախագահների հետ:
Հոկտեմբերի 27-ին Փարիզում կայացել էր Սերժ Սարգսյանի և Իլհամ Ալիևի հանդիպումը ԵԱՀԿ Մինսկի խմբի համանախագահների հետ: