Քրդստանի աշխատավորական կուսակցության (PKK) զինված թեւի առաջնորդ Ջեմիլ Բայըքը հայտարարել է, որ եթե Թուրքիայի Նախագահ Ռեջեփ Թայիփ Էրդողանի գլխավորած իշխող «Արդարություն եւ զարգացում» կուսակցությունն իսկապես ցանկանում է կարգավորել քրդական խնդիրը երկրում, ապա անհրաժեշտ է, որ քրդական խնդրի լուծման համար թուրքական կառավարության սկսած «հաշտության գործընթացի» բանակցություններում որպես միջնորդ հանդես գա ԱՄՆ-ը, կամ միջազգային որեւէ հանձնաժողով: Այս մասին քուրդ առաջնորդը հայտարարել է ավստրիական Der Standard թերթի թղթակից Միխայիլ Վյոլքերի հետ զրույցում:
Անդրադառնալով Անկարայից հնչող այն հորդորներին, թե Սիրիայում եւ Իրաքում «Իսլամական պետություն» հռչակած «Իրաքի եւ Լեւանտի իսլամական պետություն» (ԻԼԻՊ) խմբավորման դեմ պայքարի հետ կապված թուրքաբնակ քրդերը պետք է «մի քիչ էլ սպասեն» խնդրի կարգավորման հարցում, Բայըքն ասել է, որ ստեղծված իրավիճակում իրենք ցանկանում են քրդերի եւ Անկարայի միջեւ միջնորդ տեսնել հեղինակավոր երկրի կամ միջազգային կազմակերպության: «Դա կարող է լինել ԱՄՆ-ն կամ միջազգային որեւէ հեղինակավոր հանձնաժողով: Խնդրի կարգավորման գործում միջնորդների, դիտորդների կարիք կա: Մենք կարող ենք որպես դիտորդ ընդունել ամերիկացիներին եւս, եւ ինչպես տեսնում ենք, դրան գնացող ընթացք կա», -ասել է նա:
PKK-ի զինված թեւի առաջնորդը համոզմունք է հայտնել, որ իրաքյան Քրդստանի կանոնավոր բանակի (փեշմերգի)` իր տարածքով Քոբանի անցմանը Թուրքիայի թույլատրությունը քրդական խնդրի լուծման հարցում Անկարայի «մարտավարության փոփոխություն» է միայն: «Էրդողանը պահանջում էր, որպեսզի միջազգային հանրությունը Քոբանիում կռվի PKK-ի եւ քրդական Դեմոկրատական միասնության կուսակցության (YPG) աշխարհազորականների դեմ: Ամերիկացիները դա չընդունեցին: Թուրքիայի կողմից այդ մարտավարության փոփոխության գործում մեծ բաժին ունի ԱՄՆ-ն եւ միջազգային հանրությունը», -ասել է նա:
Բայըքը նշել է, թե այն, որ ԱՄՆ-ն եւ այլ երկրներ զենք մատակարարեցին YPG-ին, խոսում է Թուրքիայի դիվանագիտական պարտության մասին: «ԱՄՆ-ի եւ Եվրոպայի, մի կողմից, ու Թուրքիայի, մյուս կողմից նպատակների միջեւ լուրջ հակասություններ կան: Այն դեպքում, երբ ԱՄՆ-ն ու Եվրոպան ցանկանում են պայքարել ԻԼԻՊ-ի դեմ, Թուրքիան դրա փոխարեն աջակցում է ԻԼԻՊ-ին եւ գործում քրդերի դեմ: Այդ գործոություններով Թուրքիան բեռ դարձավ ամերիկացիների եւ եվրոպացիների համար: Անկարան հույս ուներ, որ կկարողանա Քոբանիում խնդիրներ ստեղծել PKK-ի եւ YPG-ի միջեւ, ինչը նրան չհաջողվեց: Քրդերը նման սադրանքների չեն գնա»,- ասել է Ջեմիլ Բայըքը:
