Իշխանությունը պնդում է, թե վարչապետի հրաժարականը կապ չունի տնտեսական, քաղաքական կամ մեկ այլ հարցի հետ, բայց բոլորս գիտենք, որ վերջին երեք տարիներին երկրում ՀՆԱ-ն 10%-ով նվազել է, և այսօր խնդիրներն ավելի շատ են, քան եղել են մոտ վեց տարի առաջ: Նման կարծիք այսօր լրագրողների հետ հանդիպմանը հայտնեց տնտեսագետ Բագրատ Ասատրյանը։
«Սա ցույց է տալիս, որ այս տիպի իշխանության գործունեությունն անարդյունք է: Բացեք Սերժ Սարգսյանի 2008-ի նախընտրական ծրագիրը, տեսեք, թե ինչ էր խոստացել ու ինչ է արել: Ասում են, թե համաշխարհային ճգնաժամ էր, բայց դա ամբողջ աշխարհում էր, իսկ Հայաստանում առաջինը ուղեղների ճգնաժամի խնդիր է»,-ասաց նա:
Տնտեսագետն ընդգծեց, որ եթե իշխող կուսակցությունն ասում է, թե վարչապետի հրաժարականը կապ չունի երկրի խնդիրների հետ, ապա դա իրականությունից կտրված է, ինչը նշանակում է, որ հայ ժողովուրդը սարսափելի վիճակում է գտնվում:
«Ընդդիմությունը լավն է եղել, թե վատը, բայց բոլոր խնդիրներն իրենք են բարձրացնում: Եթե այսօր իշխանությունը քայլ չաներ, ուրեմն փողոցում էին լուծվելու բոլոր հարցերը: Իսկ 2008 թ. մարտի մեկը մարդկանց միջից չի անցել, և այդ վերքերը պետք է դեռ փակի իշխանությունը»,-ասաց նա:
Բագրատ Ասատրյանը նաև ընդգծեց, որ իրականում հրաժարականը որևէ բան չի տա, եթե քաղաքական համակարգում փոփոխություններ չմտցվեն:
Նույն կարծիքը հայտնեց նաև մեկ այլ տնտեսագետ՝ Վարդան Բոստանջյանը, ով ընդգծեց, թե պետք չէ մտածել՝ ով կնշանակվի վարչապետի պաշտոնում, քանի որ պետք է մտածել համակարգային փոփոխությունների մասին:
«Երևի ռոմանտիկ կհնչի, բայց բոլոր բարձր պաշտոններում գտնվող այրերը պետք է նախ սիրեն երկիրը, չմտածեն, որ երկիրը միայն թալանելու համար է: Եկեք այնպիսի վարչապետ դնենք, որ գործից հասկանա, գործը իրականացնելու հնարավորություն ունենա, ոչ թե վախվորած մեկին, որ նույնիսկ վախենա խոսել»,-ասաց նա։
Անդրադառնալով այն հարցին, թե մինչ երեկ ՀՀԿ-ի կողմից պարբերաբար հերքվում էր վարչապետի հնարավոր հրաժարականի հանգամանքը, նշեց. «Այդ ինչ թիմ է, որ իրենց համար հայտնի չէր, թե ներսում ինչ է կատարվում»։
