Չինաստանը հուսով է, որ Լեռնային Ղարաբաղի հակամարտող կողմերը կկարողանան պահպանել հանդարտությունն ու զսպվածություն կցուցաբերեն՝ լարվածության մեծացումից խուսափելու համար, հայտարարել է Չինաստանի ԱԳՆ պաշտոնական ներկայացուցիչ Հոնգ Լեյը:
Ինչպես տեղեկացնում է ադրբեջանական Trend գործակալությունը, մեկնաբանելով վերջին օրերին շփման գծում տեղի ունեցած միջադեպը՝ Չինաստանի ԱԳՆ ներկայացուցիչը հույս է հայտնել, որ հակամարտությունը կկարգավորվի երկխոսության ճանապարհով:
Նա նաև հույս է հայտնել, որ ԵԱՀԿ Մինսկի խումբը կառուցողական դերակատարություն կունենա այդ հարցում:
Հիշեցնենք, որ օրեր առաջ Ադրբեջանը դարձյալ խախտել էր հրադադարի ռեժիմն ու խոցել էր զորավարժությունների մասնակցող ղարաբաղյան Մի-24 ուղղաթիռը, որում եղել էր անձնակազմի 3 անդամ: Նրանց ճակատագիրն առայժմ անհայտ է, քանի որ ադրբեջանական կողմը թույլ չի տալիս մոտենալ խոցված ուղղաթիռին:
