ԱՄՆ-ում կայացել է ԴԱԻՇ-ի դեմ ռազմական արշավի մասնակից պետությունների ներկայացուցիչների նոր հանդիպումը: Այս մասին հայտնել է ԱՄՆ ԶՈւ Կենտրոնական հրամանատարությունը՝փոխանցում է TASS գործակալությունը:
Բանակցություններն անցկացվել են Ֆլորիդայի Տամպա քաղաքում գտնվող կենտրոնական հրամանատարության շտաբում: Խորհրդակցություններին մասնակցել են 33 երկրների պաշտոնատար անձինք, ովքեր զբաղվում են ռազմական պլանավորմամբ: Համաժողովը սկսվել է նոյեմբերի 12-ին և տևել 10 օր: Մասնակցել են մոտ 200 զինվորական առաջնորդներ:
Զգալի ուշադրություն է դարձվել ծրագրերի հետագա զարգացմանը՝ ուղղված Իրաքի անվտանգության ուժերի նախապատրաստմանն ու զինմանը, որպեսզի նրանք կարողանան վերականգնել մարտական հզորությունը, դիմակայեն ԴԱԻՇ-ին և վերջին հաշվով կարողանան ինքնուրույն ապահովել երկրի պաշտպանությունը:
Համաժողովի մասնակիցներն ի մի են բերել ծրագրերը և քննարկել, թե ինչպես կարելի է լավագույնս ապահովել ջանքերի համաժամանակեցումն ու փոխլրացումը՝ կոչված օգնելու իրաքցիներին:
Կենտրոնական հրամանատարության ղեկավար, գեներալ Լլոյդ Օսթինը հաստատել է, որ համաժողովին վիթխարի առաջնթաց է ձեռք բերվել: