Հայաստանի սպառողական շուկայում մեկ տարվա ընթացքում արձանագրվել է 3,6 տոկոս գնաճ: Նախորդ տարվա մայիսի համեմատ այս տարի մայիսին պարենային ապրանքների գներն աճել են 1,4 տոկոսով, ոչ պարենային ապրանքների գները 2 տոկոսով, ծառայությունների գները 7,8 տոկսով: Այս մասին լրագրողների հետ հանդիպման ժամանակ տեղեկացրեց ՀՀ ազգային վիճակագրական ծառայությանգների վիճակագրության և միջազգային համադրումների բաժնի պետ ԳուրգենՄարտիրոսյանը` ներկայացնելով մայիս ամսվա գնաճի ցուցանիշները ՀՀ շուկայում: Նրա խոսքով, ծառայությունների գնաճը պայմանավորված է եղել նախորդ տարվա հուլիսին և օգոստոսին էլեկտրաէներգիայի և գազի սակագների բարձրացմամբ:
Մարտիրոսյանը նաև տեղեկացրեց, որ մայիսին ապրիլի համեմատ սպառողական շուկայում արձանագրվել է 0.8 տոկոս գնանկում, իսկ ընդհանուր 5 ամիսների ընթացքում արձանագրվել է 0,9 տոկոս գնաճ: «Պարենային ապրանքների գները ապրիլ-մայիս ամիսներին նվազել են 1.4 տոկոսով, ծառայությունների սակագները՝ 0.2 տոկոսով, իսկ ոչ պարենային ապրանքների շուկայում գրանցվել է 0.3 տոկոս գնաճ: Գնանկումը հիմնականում արձանագրվել է պարենային ապրանքների գնանկման արդյունքնում: Պարենային 13 ապրանքախմբերից 6-ում արձանագրվել է գնաճ` 0,1-3,4 տոկոս, իսկ 7 ապրանքային խմբերում արձանագրվել է գնանկում 0,1-12 տոկոս: Առավել բարձր գնաճ արձանագրվել է մրգի ապրանքային խմբում` 3,4 տոկոս, հացամթերքի ապրանքային խմբում` 0,6 տոկոս, մսամթերքի ապրանքախմբում` 0,7 տոկոս: Ամենամեծ գնանկումն արձանագրվել է բանջարեղենի և կարտոֆիլի ապրանքային խմբում` 12,5 տոկոս, ձվի գները նվազել են 4,8 տոկոսով»,- ասաց Մարտիրոսյանը:
Նա նշեց, որ մայիսին 251 ապրանքախմբում արձանագրվել է գնաճ, 169-ում` գնանկում, իսկ 50-ում` գինը մնացել է անփոփոխ: «Հանրապետության 10 քաղաքներում 2014թ. մայիսին ապրիլի համեմատ սպառողական գները նվազել են 1.2-0.1 տոկոսով: Գնանկման ամենաբարձր ցուցանիշն արձանագրվել է Գավառ քաղաքւմ, իսկ Եղեգնաձորում պահպանվել է գների նախորդ ամսվա մակարդակը: Մայրաքաղաքում սպառողական գների ընդհանուր մակարդակը նախորդ ամսվա համեմատ նվազել է 0.8 տոկոսով»,-ասաց Մարտիրոսյանը: