Փակ սահմանների քաղաքականության տնտեսական, քաղաքական, հասարակական ու տարածաշրջանային կողմերը քննարկելու համար «Հրանտ Դինք» հիմնադրամն Անկարայի համալսարանի քաղաքական գիտությունների ֆակուլտետի հետ համաժողով է կազմակերպել՝ «Զմռսված դարպաս. Թուրքիա-Հայաստան սահմանի ապագան» խորագրով:
Ինչպես տեղեկացնում է «Ակօս»-ը, «Հրանտ Դինք» հիմնադրամի ղեկավար Ռաքել Դինքը համաժողովի բացման խոսքում նշել է, թե իրենք «ցանկանում են վերացնել բոլոր սահմանները, որոնք մարդկանց բանտարկում են և հեռացնում խղճից»:
Համաժողովին մասնակցել է նաև Քարնեգի հիմնադրամի Կովկասի անվտանգության հարցերով առաջատար փորձագետ Թոմաս դե Վաալը, ով խոսելով հայ-թուրքական սահմանը բացելու համար Ղարաբաղյան հարցի լուծման նախապայմանի մասին՝ ասել է. «Սահմանը փակ պահելու համար օգտագործվող Ղարաբաղյան հարցը սառեցված չէ իրականում: Դրա համար դեռ մարդիկ են իրենց կյանքը զոհում: Եթե խաղաղությունը չհաստատվի ու մի օր ճնշումն ավելանա, հետևանքներն ավերիչ կլինեն»:
Համաժողովի երկրորդ օրը քննարկվել են հայ-թուրքական սահմանի փակ լինելու տնտեսական հետևանքներն ու տնտեսական համագործակցության հնարավորութունները:
«Բաց սահմաններ, բաց շուկաներ» խորագրով քննարկման ընթացքում ներկայացվել են տնտեսական ուսումնասիրության արդյունքները, համաձայն որոնց՝ տարածաշրջանի սոցիալ-տնտեսական վիճակը տուժում է փակ սահմանների պատճառով:
Իսկ լրագրող Ամբերին Զամանի և «Գալուստ Գյուլբենկյան» հիմնադրամի ղեկավար Ռազմիկ Փանոսյանի գլխավորած նիստի ընթացքում, որը կրել է «Բաց սահմաններ, բաց գաղափարներ» խորագիրը, խոսվել է սահմանամերձ շրջանների մշակութային բազմազանութան, լեզվի, երաժշտության և այլ հարցերի մասին:
Համաժողովի մեկ այլ նիստ էլ կրել է «Սահմանները հաղթահարողները» խորագիրը: Այդ նիստի ընթացքում քննարկվել են Հայաստան-Թուրքիա քաղաքացիական հասարակության երկխոսության և ազգային դիվանագիտության մասին:
