Այսուհետ Վրաստանում շինարարության թույլտվությունը տալու է ոչ թե երկրի նախագահը, այլ՝ կառավարությունը, տեղեկացնում է interpressnews վրացական կայքը:
Այդպիսով՝ Վրաստանի նախագահ Գեորգի Մարգվելաշվիլին զրկվել է իր ևս մեկ լիազորությունից:
Մինչ այս նախագահն էր որոշում, թե որ գերատեսչությունը պետք է շինարարության համար թույլտվություն տա: Այդ մասին լրագրողներին հայտնել է Թբիլիսիի քաղաքապետ Դավիդ Նարմանիան:
«Վրաստանի կառավարությունն է նախագահի փոխարեն որոշելու, թե ով իրավունք ունի շինարարության թույլտվություն տալ: Դա տեխնիկական բնույթի փոփոխություն է»,-ասել է նա:
Հիշեցնենք, որ Վրաստանում Սահմանադրության փոփոխությամբ նախագահին վերապահված լիազորությունները զգալիորեն կրճատվել էին, քանի որ երկիրն անցել էր կիսանախագահական-կիսախորհրդարանական մոդելի:
Օրերս էլ խորհրդարանին հաջողվել էր շրջանցել նախագահի վետոն և ընդունել գաղտնալսումների մասին վիճահարույց օրինագիծը: