Ուկրաինայի նախագահ Պյոտր Պորոշենկոն հայտարարել է նոր նախաձեռնության մասին, որը նպատակամղված է երկրի արեւելքում գործող աշխարհազորայինների հետ փխրուն հրադադարի ամրապնդմանը: Ուժային գերատեսչությունների ղեկավարների հետ կայացած խորհրդակցության ժամանակ պետության ղեկավարը հայտարարել է դեկտեմբերի 9-ից Դոնբասում «անդորրի օր» սահմանելու մասին:
Ուկրաինայի նախագահի վարչակազմի աղբյուրը Agence France-Presse-ին հայտնել է, որ եթե Դոնեցկը եւ Լուգանսկը վերահսկող անջատականները կատարեն զինադադարի պայմանները, ապա Ուկրաինան կկարողանա դեկտեմբերի 10-ից սկսել ծանր տեխնիկայի հետքաշումը ռազմաճակատի գծից:
Ինքնահռչակ Լուգանսկի Ժողովրդական Հանրապետության ղեկավար Իգոր Պլոտնիցկին ՌԻԱ Նովոստիին հավաստել է, որ իրենք Կիեւի հետ բանավոր պայմանավորվածություն ունեն դեկտեմբերի 9-ից Դոնբասում հրադադար հայտարարելու վերաբերյալ, բայց համապատասխան փաստաթուղթը դեռեւս չի ստորագրվել:
Մինչ այդ ԱՄՆ-ի Կոնգրեսի ներկայացուցիչների պալատը նախօրյակին բանաձեւ է ընդունել, որով վճռականորեն դատապարտվում է հարեւան պետությունների նկատմամբ Ռուսաստանի գործողությունները: Դրանում, մասնավորապես, աջակցություն է հայտնվում նախագահ Պորոշենկոյի եւ Ուկրաինայի ժողովրդի այն ջանքերին, որոնք նպատակամղված են երկրում խաղաղության հաստատմանը:
Բանաձեւը «հաստատում է իրենց ինքնիշխան իրավունքները իրականացնելու Ուկրաինայի, Վրաստանի եւ Մոլդովայի իրավունքը՝ առանց արտաքին ինտերվենցիայի»:
