ՌԴ կառավարությունը Պետդումային է ներկայացրել օրինագիծ, որի համաձայն պետական ընկերությունները և ռազմավարական նշանակության կազմակերպությունները միայն սահմանափակ թվով բանկերի հետ կարող են աշխատել: Այդ մասին հայտնում է «Ведомости» թերթը: Բանկը պետք է կամ պատկանի պետությանը, կամ էլ ունենա կապիտալի համապատասխան մակարդակ: Նոր փոփոխությունները կոչված են ամրապնդելու արդեն հաստատված փորձը, որի համաձայն ռազմավարական նշանակության կազմակերպությունները (մոտ 170) արդեն իսկ աշխատում են խոշոր և «վստահելի» բանկերի հետ:
Օրինագիծն առանձին բանկերի համար, որոնք չեն համապատասխանում պահանջներին, նախատեսում է բացառություն անել: Եթե պետական կամ ռազմավարական նշանակության կազմակերպությունն արդեն իսկ հաշիվ է բացել բանկում, որը չի պատկանում սահմանափակ բանկերի թվին, ապա կազմակերպությունը մի տարվա ընթացքում՝ հաշված թույլատրված բանկերի ցուցակի հրապարակման օրվանից, պետք է փակի հաշիվը: Թույլատրված բանկերի ցուցակից դուրս մնացած բանկերում բացված դեպոզիտների վրա պահանջը չի տարածվում, սակայն դրանց ժամկետը չի կարող երկարաձգվել:
ՌԴ ֆինանսների փոխնախարար Ալեքսեյ Մայիսեևը փորձեց հանդարտեցնել բանկային հասարակությանը, հայտարարելով, որ բանկերի ցուցակը, որտեղ պետական կազմակերպությունները կարող են պահել իրենց միջոցները, բավականին մեծ է լինելու. «Դրանք ոչ թե հինգ, 10 կամ նույնիսկ 20 բանկ են, այլ բազմաթիվ տասնյակներ», — ասաց նա: Կապիտալի հետ կապված պահանջները դեռևս որոշված չեն: