Այսօր Մոսկվայում անցկացված ՀԱՊԿ անդամ երկրների գագաթնաժողովի ընթացքում ՌԴ նախագահ Վլադիմիր Պուտինը հայտարարել է, որ Հավաքական անվտանգության պայմանագրի կազմակերպության (ՀԱՊԿ) առաջին հումանիտար կենտրոնը կբացվի Հայաստանում,- գրում է ՏԱՍՍ գործակալությունը։
«Ռուսաստանի ակտիվ աջակցությամբ ստեղծվում է ՀԱՊԿ հումանիտար կենտրոնների ցանց, որոնցից առաջինը հաջորդ տարի կբացվի Հայաստանում, ավելի ուշ նմանատիպ կենտրոն կսկսի գործել Ղրղզստանում»,- նշել է ՌԴ նախագահը։
Ավելի վաղ գագաթաժողովի ընթացքում Պուտինը նշել էր, որ աշխարհում ներկայիս դժվարին իրավիճակը ՀԱՊԿ անդամ երկրներից համաձայնեցված գործողություններ է պահանջում։
«Մեր գագաթաժողովն անցկացվում է դժվարին ժամանակաշրջանում, իրավիճակն աշխարհում դինամիկ փոփոխվում է, սրանում են հին խնդիրները, սակայն, ցավոք, հայտնվում են նաև նորերը, տեղի է ունենում գլոբալ անվտանգության համակարգի աղավաղում»,- ասել էր Պուտինը՝ բացելով ՀԱՊԿ գագաթաժողովը։
Հայտնի է նաև, որ ՀԱՊԿ անդամ երկրների՝ Ռուսաստանի, Հայաստանի, Բելառուսի, Ղազախստանի, Ղրղզստանի և Տաջիկստանի առաջնորդները 22 փաստաթուղթ են ընդունել։ Առաջնորդները հաստատել են պետությունների ղեկավարների համատեղ հայտարարությունը, 19 որոշում և 2 արձանագրություն։
