Թուրքիայի վարչապետ Ահմեթ Դավութօղլուի հայազգի խորհրդական Էթյեն Մահչուփյանը հայտնել է, որ «Թուրքիան ու Հայաստանը չպետք է ակնկալեն, որ Առաջին աշխարհամարտի ժամանակ հայերի զանգվածային սպանության վերաբերյալ երկարատև վեճը եկող տարում լուծում կստանա»:
Ինչպես նշում է alarabiya.net-ը, Agence-France Presse լրատվական գործակալության հետ զրույցում Մահչուփյանն ասել է, որ «2015թ. ծանր տարի է լինելու տեղի ունեցած ողբերգության 100- ամյակի և դրան հաջորդող իրադարձությունների առումով»:
«Կարծում եմ՝ այս տարի հնարավոր է խորհրդանշական քայլեր անել ու մտերիմ հարաբերություններ հաստատել: Սակայն քաղաքական ու պատմական հարցերի լուծումը կմնա եկող տարիներին, քանի որ այդպես ավելի լավ կլինի»,-ասել է խորհրդականը:
Աղբյուրը նկատում է, որ Մահչուփյանն այն քիչ հայերից է, ովքեր Թուրքիայում զբաղեցնում են կառավարական պաշտոններ: Խորհրդականը նշել է, որ «ապագայի համար Թուրքիայի իշխանությունների գլխավոր նպատակներից է հարաբերություններ հաստատել Հայաստանի, ինչպես նաև բազմամիլիոնանոց հայ համայնքի հետ, որի ներկայացուցիչներից շատերն ատելություն են զգում Թուրքիայի հանդեպ»:
