Սիրիայի ընդդիմությունը «ճանապարհային քարտեզ» է առաջարկել Սիրիայի ճգնաժամի հաղթահարման համար:
Ինչպես տեղեկացնում է Взгляд-ը, այդ մասին հայտնի է դարձել Մոսկվայում Սիրիայի կառավարության և ընդդիմության պատվիրակությունների միջև կայանալիք հանդիպումից առաջ:
Արաբական «Ալ-Մայադին» հեռուստաընկերությունը տեղեկացրել է, որ ներքին և արտաքին ընդդիմության երկու խմբավորումները՝ Ազգային համակարգման կոմիտեն և Ընդդիմադիր ու հեղափոխական ուժերի ազգային կոալիցիան, համաձայնության են հասել, որն առնչվում է ապագա փաստաթղթի կետերին, և այն առաջիկա օրերին կարող է ստորագրվել Կահիրեում:
Փաստաթուղթը հիմնված է 2012թ.-ի հունիսի 30-ի Ժնևյան կոմյունիկեի վրա և նախատեսում է լայն լիազորություններով օժտված անցումային մարմնի ստեղծում, որի կազմում ներառված են լինելու նաև ներկա իշխանությունների ներկայացուցիչները, ընդդիմադիրներն ու քաղաքացիական հասարակությունը:
Նախագիծը նախատեսում է Սիրիայում ժողովրդավարական ընտրությունների նախապատրաստում՝ միջազգային վերահսկողության ներքո, ինչի արդյունքում ձևավորվելու է խորհրդարան:
Անցումային գործընթացի ընթացքում չեղարկվելու են երկրում քաղաքական գործունեությանն առնչվող բոլոր սահմանափակումները, քաղբանտարկյալները դուրս են գալու բանտերից, իսկ արտագաղթածները հայրենիք վերադառնալու իրավունք են ստանալու:
Պաշտպանության ու անվտանգության հարցերով զբաղվելու է ժամանակավոր ռազմական խորհուրդը, որի կազմի մեջ լինելու են սիրիական բանակի և ապստամբների սպաներ: