Ինչպես հաղորդում է «Երրորդ համաշխարհային պատերազմ» պորտալը, ուկրաինական արմատական ազգայնական «Աջ սեկտորի» գրոհայինները հրաժարվել են ենթարկվել երկրի պաշտպանության նախարարությանը:
Մասնավորապես, գրոհայինների լիդերներից Իգոր Մազուրը հայտարարել է, որ Ղրիմում ու Դոնբասում անհրաժեշտ է դիվերսիոն գործողություններ ծավալել:
Նրա խոսքերով, անհրաժեշտ է այդ շրջաններ ուղարկել պարտիզանական խմբեր, որոնք արդյունավետ հարվածներ կհասցնեն, կպայթեցնեն կամուրջներ ու պետական այլ կառույցներ:
Ավելի վաղ, ազգայնականները մերժել են Ուկրաինայի պաշտպանության նախարարության առաջարկը՝ համալրելու բանակի շարքերը՝ պայմանագրային հիմունքներով:
Ինչպես հայտնել է նախագահի խորհրդական Յուրի Բիրյուկովը, ազգայնականներին առաջարկվել է մի շարք պայմաններ ու տարբերակներ, որոնք մերժվել են «Աջ սեկտորի» կողմից:
Վերջում նա ավելացրել է, որ գրոհայինների օրինական ուժ մնալու ու միաժամանակ պաշտպանության նախարարությանը չենթարկվելու ցանկությունն առնվազն գիտական ֆանտաստիկայի ժանրից է: