ԱՄՆ-ի նախագահ Բարաք Օբաման, որը հունվարի 25-27 –ին պետական այցով կմեկնի Հնդկաստան, չեղյալ է հայտարարել Ագրա քաղաք կատարելիք այցը, որտեղ գտնվում է հայտնի Թաջ Մահալ դամբարանը։
«Արտգործնախարարությունն առավոտյան տեղեկացրեց, որ Օբաման Ագրա չի այցելի», - Ագրա քաղաքի իշխանությունների ներկայացուցիչ Զոհաիր Բին Սաղիրի խոսքերն է փոխանցում ՏԱՍՍ-ը։ Այցի չեղարկման պատճառները չեն հստակեցվում։
Բարաք Օբաման Հնդկաստանի մայրաքաղաք կժամանի հունվարի 25-ի առավոտյան եւ կհանդիպի վարչապետ Նարենդրա Մոդիի հետ։
Ավելի վաղ հաղորդվել էր, որ ԱՄՆ-ի նախագահի այցի կապակցությամբ անվտանգության ուժեղացված միջոցառումներ են ձեռնարկվել, ընդհուպ՝ բջջային կապի անջատում, քանի որ հայտնի է դարձել, որ Օբամայի այցին պատրաստվում են նաեւ ահաբեկչական կազմակերպությունները։
Նախօրեին Times of India-ն, վայակոչելով պաշտոնական անձանց, հայտնել էր, որ Օբամայի Ագրա այցի ընթացքում Թաջ Մահալի մոտակա շրջաններում բջջային կապն անհասանելի կլինի երեք ժամ ։
Ամերիկյան կողմը արբանյակային լուսանկարների միջոցով 8 երթուղի է նախանշել, որոնցով Օբաման կարող է լքել միջոցառումը արտակարգ իրավիճակի դեպքում։ Բացի այդ, երթուղու երկայնքով գտնվող շինություններում ամերիկացի զինծառայողներ կլինեն, որոնք բնակիչներին կարգելեն անգամ պատուհան բացել։
