Թուրքիայի ընդդիմադիր Հանրապետական ժողովրդական կուսակցության Իզմիրի պատգամավոր Բիրգյուլ Այման Գյուլերը հայտնել է, որ կուսակցությունից հեռանում է այն պատճառով, որ իր կուսակից ընկերները մասնակցել էին Հրանտ Դինքի տարելիցին նվիրված միջոցառմանը: Այս մասին տեղեկացնում է թուրքական «Թարաֆ» պարբերականը:
Գյուլերը նշել է, որ իրեն անհանգստացնում է այն, որ իրենց կուսակցության նոր անդամներն աջակցում են «իրականությունից դուրս ցեղասպանության մասին մեղադրանքներին»` այն էլ 2015 թվականին: Պատգամավորին մասնավորապես դուր չի եկել այն, որ քեմալական Հանրապետական ժողովրդական կուսակցության պատգամավորներ Շաֆաք Փավեյը և Սեզգին Թանրըքուլուն Դինքի մահվան տարելիցին կանգնել էին «Առերեսվեք Դինքի հետ, առերեսվեք Ցեղասպանության հետ» գրությամբ պաստառի հետևում:
