Ֆրանսիայի նախագահ Ֆրանսուա Օլանդը Եվրամիության գագաթաժողովից հետո հաղորդել է, որ «նորմանդական քառյակը» (Ուկրաինայի, Ռուսաստանի, Ֆրանսիայի, Գերմանիայի առաջնորդները) հաջորդ շաբաթ հեռախոսով կքննարկի մինսկյան պայմանավորվածությունները, իսկ մի քանի շաբաթ անց՝ հնարավոր է դեմ առ դեմ հանդիպում, տեղեկացնում է РИА Новости գործակալությունը:
«Մենք մտածեցինք, որ եթե կրակի դադարեցումն իրականացվի համապատասխան պլանով, այսինքն՝ կիրակի ժամը 00:00-ից, ապա հաջորդ շաբաթ անհրաժեշտ կլինի գոնե հեռախոսային կոնֆերանս անցկացնել»,- ասել է Օլանդը:
Խոսելով Ռուսաստանին փոխանցվելիք առաջին «Միստրալ» դասի ուղղաթիռակրի մասին՝ գործիչը նշել է, որ դեռ դրա համար պայմաններ չեն ստեղծվել: «Հուսով եմ, որ մի օր դրանք կիրականանան»,-ասել է Ֆրանսիայի նախագահը:
Նա պարզաբանել է, որ ուղղաթիռակիրների համար նախապայման է, մասնավորապես, Ուկրաինայում հրադադարի մասին պայմանագրի իրագործումն ու Մինսկում կնքված պայմանավորվածությունների իրագործումը:
«Եթե դա իրականացվի և համաձայնագիրը պահպանվի, ապա Եվրոպան աստիճանաբար կսկսի չեղարկել պատժամիջոցները»,-ասել է Օլանդը՝ նշելով, որ ֆորմալ առումով «Միստրալների» փոխանցումը պատժամիջոցների տակ չէ: