Բուքինգհեմյան պալատից հաստատել են, որ արքայազն Չարլզն ու արքայազն Հարրին ներկայացնելու են արքայական ընտանիքը Գալիպոլիի ճակատամարտի 100-ամյակին նվիրված միջոցառումներին:
Արքայազն Վիլյամը, սակայն, ում երկրորդ երեխան կծնվի ապրիլին, կմնա Լոնդոնում: Այդ մասին հաղորդում է New Zealand Herald-ը:
«Ապրիլի 24-ին և 25-ին Ուելսի արքայազնը, արքայազն Հարրիի ուղեկցությամբ, կմասնակցի Գալիպոլիի ճակատամարտի 100-ամյակին նվիրված հիշատակի միջոցառումներին և Ավստրալիայի ու Նոր Զելանդիայի ազգային տոնին (ԱՆԶԱԿ-ի օր)», - նշված է պալատի կողմից ուրբաթ օրը տարածած կարճ հայտարարության մեջ:
Բուքինգհեմյան պալատից հայտնել են նաև, որ ԱՆԶԱԿ-ի օրը Բրիտանիայի թագուհին, արքայազն Ֆիլիպն ու արքայազն Վիլյամը Լոնդոնում ծաղկեսակ կդնեն անհայտ զինվորի հուշարձանի մոտ: