Մարտի 16-ից կդադարեցվի ՌԴ սահմանամերձ շրջանների բնակիչների անցուդարձը Ռուսաստանի հետ Ուկրաինայի սահմանային անցակետերում: Ինչպես փոխանցում է Корреспондент-ը` այս մասին հայտնել են Ուկրաինայի պետական սահմանային ծառայությունում:
«Ուկրաինայի նախարարների կաբինետի որոշմամբ` 2015-ի մարտի 4-ից պետական սահմանը հատելու ժամանակավոր արգելք է սահմանվում ՌԴ սահմանամերձ շրջանների բնակիչների համար: Մասնավորապես՝ մարտի 16-ից դադարեցվում է անցուդարձը ռուս-ուկրաինական պետական սահմանի անցակետերում», - ընդգծել են սահամանային ծառայությունում:
Սահմանային վերահսկողությունն ու անցաթղթի տրամադրումը այդ մարդկանց համար միջպետական անցակետերում կիրականացվի արտասահմանյան ճանապարհորդությունների համար նախատեսված անձնագրով: ՌԴ քաղաքացիների ներքին անձնագրերը և ծննդյան վկայականները (մինչև 14 տարեկան երեխաների համար) Ուկրաինա մտնելու համար բավարար չեն լինի:
Հիշեցնենք, որ մարտի մեկից ՌԴ քաղաքացիները կարող են Ուկրաինա մտնել միայն արտասահմանյան անձնագրով, իսկ այժմ այդ օրենքը տարածվում է նաև սահմանամերձ շրջանների բնակիչների վրա:
