Ազգային ժողովում Հանրային հեռուստառադիոընկերության 2013 թվականի գործունեության վերաբերյալ հաշվետվության քննարկմանը ԱԺ «Հանրապետական» խմբակցության պատգամավոր Սամվել Ֆարմանյանը բարձրացրեց Հանրային ռադիոյի աշխատակիցների աշխատավարձերի վերանայման խնդիրը:
«Հանրային ռադիոյի աշխատակիցների աշխատավարձը միջինացված թվերով մրցունակ չեն, ի՞նչ միջոցներ եք նախատեսում այս խնդրի առնչությամբ, իհարկե, ցավոք, 2014թ-ին խնդիրը չի լուծվել, բայց ես մի փոքր առաջ եմ անցնում՝ ի՞նչ եղանակներ եք մտածում աշխատավարձերի վերաբերյալ»,- հարցն ուղղեց Հանրային Հեռուստառադիոընկերության տնօրեն Ռուբեն Ջաղինյանին:
Ֆարմանյանը նկատեց, թե իրենք պատրաստ են 2015թ-ի բյուջետային քննարկումների ժամանակ այս հարցը կրկին բարձրացնել, որպեսզի լրացուցիչ միջոցներ տրամադրվեն:
Ռուբեն Ջաղինյանը համաձայնվեց, որ իսկապես այդ խնդիրը կա և հարցն իրենց ուշադրության կենտրոնում է: «Շնորհակալ կլինենք, որ գալիք բյուջեի քննակման ժամանակ այդ հարցը բարձրացնեք, քանի որ դա է միակ լուծումը»,-ասաց նա:
