Թուրքիայի և Ռուսաստանի միջև բնական գազի գինը զեղչելուն ուղղված բանակցություններում տարաձայնություններ են առաջացել:
Ինչպես տեղեկացնում է Haberler կայքը, Թուրքիայի էներգետիկայի նախարար Թաներ Յըլդըզն ասել է, որ չնայած Ռուսաստանի կողմից 10.25 տոկոսանոց զեղչին՝ BOTAŞ-ը վերջին պահին հրաժարվել է ստորագրել փաստաթուղթը:
Ռուսական «Գազպրոմ» ընկերությունը հայտնել է, որ զեղչը պետք է կիրառվի որոշակի քանակի դեպքում, ինչի պատճառով էլ թուրքական կողմը հրաժարվել է ստորագրել:
Թուրքիայի էներգետիկայի նախարարության աշխատակիցները նշել են, որ խնդիրը հնարավոր է շտկել:
Փետրվարի 27-ին Թուրքիայի էներգետիկայի նախարարը հայտարարել էր, որ Մոսկվան և Անկարան համաձայնության են եկել ռուսական գազը 10,25 զեղչով գնելու մասին:
Գազի գինը զեղչելու մասին առաջինը հայտարարել էր ՌԴ նախագահ Վլադիմիր Պուտինը՝ Թուրքիա կատարած այցի ընթացքում, ինչից անմիջապես հետո թուրքական իշխանությունները հայտարարել էին ավելի մեծ զեղչի հասնելու համար բանակցությունները շարունակելու մասին:
