Իրանի եկամուտները նավթի արտահանումից նվազել են 30 տոկոսով: Այս մասին հայտարարել է Իսլամական պետության նախագահ Հասան Ռուհանին՝ փոխանցում է IRNA գործակալությունը:
Նրա խոսքով՝ նավթի գնի սահմանման ոլորտը գերիշխող գործոն չէ: Այդ հարցում մեծ դեր են խաղում քաղաքականությունն ու գլոբալ դավադրությունները՝ նշել է Ռուհանին:
Նավթի գնի անկումը համաշխարհային շուկաներում որոշակի անհանգստություն է առաջացրել Իրանում՝ կապված ընթացիկ իրանական օրացուցային ֆինանսական տարվա (ավարտվում է 2015 թվականի մարտի 20-ին) բյուջեի հնարավոր դեֆիցիտի հետ:
Ընթացիկ տարվա բյուջեում Իրանը նավթի գինը սահմանել էր մեկ բարելի դիմաց 100 դոլարի մակարդակի վրա:
Ավելի վաղ հաղորդվել էր, որ Իրանը թեթև նավթ է արտահանում մեկ բարելը 84.25 դոլարով, իսկ ծանրը՝ 82.61 դոլարով:
Ոլորտի ներկայացուցիչներն առաջարկում են հաջորդ տարվա բյուջեն կազմել նավթի մեկ բարելի՝ 70-75 դոլար արժեքի հաշվարկով:
ՕՊԵԿ-ի (Նավթ արտահանող երկրների կարտել) տվյալներով՝ ընթացիկ տարվա սեպտեմբերին Իրանն օրական 2.675 մլն բարել նավթ է արտահանել:
