ԱՄՆ Սպիտակ տան նախկին աշխատակցուհի Մոնիկա Լևինսկին պատմել է նախկին նախագահ Բիլ Քլինթոնի հետ ունեցած սիրավեպի մասին, փոխանցում է Обозреватель-ը։
«22 տարեկանում ես սիրահարվեցի իմ ղեկավարին։ 24 տարեկանում ես հասկացա կործանարար հետևանքները»,- ասել է Լևինսկին՝ TED կազմակերպության գիտաժողովի ժամանակ։
Լևինսկու ելույթը եղել է նրա ամենալուրջ հանրային ելույթը մինչ օրս։
Նրա ելույթը կոչվել է «Ամոթի գինը»։
«Ինչպես և ես 22 տարեկանում, ձեզանից ոմանք նույնպես կարող էին սխալ քայլեր անել՝ սիրահարվելով ոչ այն մարդուն։ Միգուցե նաև՝ ձեր ղեկավարին։ Չնայած, ի տարբերություն ինձ, ձեր շեֆը դժվար թե լիներ ԱՄՆ նախագահը»,- ասել է Լևինսկին։
Քլինթոնի նախկին սիրուհին խոստովանել է, որ ինքն ակնթարթորեն վերածվել է «բացարձակ մասնավոր կերպարից» մի մարդու, ում հրապարակայնորեն ստորացնում էին։ Այսօր, ըստ Լևինսկու, համացանցը հրապարակային ստորացումն ավելի տարածված է դարձրել։
Նրա խոսքով՝ խնդրի լուծման համար անհրաժեշտ է «մշակութային հեղափոխություն»։ «Եկել է համացանցին և մեր մշակույթին միջամտելու ժամանակը։ Դուք կարող եք պնդել, որ ձեր պատմությունն այլ ավարտ ունենա»,- նշել է Լևինսկին։
