Աֆղանստանում սկանդալ է առաջացել Սպիտակ տան ղեկավար Բարաք Օբամայի սխալից հետո։ Վերջինս մոռացել է «պատմական այցով» Վաշինգտոն ժամանած Աֆղանստանի նախագահ Աշրաֆ Ղանի Ահմադզայի ազգանունը, գրում է ՏԱՍՍ գործակալությունը՝ հղում անելով Hama Press գործակալությանը։
Համատեղ մամուլի ասուլիսի ժամանակ Օբաման իր խոսքում մի քանի անգամ Աֆղանստանի նախագահին անվանել է Քարզայ (Համիդ Քարզայը եղել է Աֆղանստանի նախագահը 2004-2014թթ.)։ Ընդ որում՝ Ահմադզայը փորձել է ուշադրություն չդարձնել ԱՄՆ նախագահի սխալին։
Hama Press-ում նշում են, որ Օբաման այդպես էլ չի կարողացել հիշել աֆղանստանցի նոր նախագահի ազգանունը, թեև նա արդեն կես տարի է՝ զբաղեցնում է երկրի նախագահի պաշտոնը, և 2 օր է՝ այցով գտնվում է ԱՄՆ-ում։
