Վրաստանի «Ազատ գոտի» երիտասարդական կազմակերպության ներկայացուցիչներն ու կողմնակիցները, որոնք աջակցում են Վրաստանի նախկին նախագահ Միխայիլ Սահակաշվիլու «Միասնական ազգային շարժում» կուսակցությանը, բողոքի ակցիա են անցկացնում Holliday Inn հյուրանոցի առաջ, որտեղ սկսվել է Վրաստանի վարչապետ Իրակլի Ղարիբաշվիլու մամուլի ասուլիսը, հաղորդում է ՌԻԱ Նովոստին։
Նախորդ շաբաթ «Միասնական ազգային շարժումը» Թբիլիսիում բողոքի ակցիա էր կազմակերպել։ ԶԼՄ–ների տեղեկությամբ` ակցիային մասնակցել է 10–15 հազար մարդ, կազմակերպիչները հայտարարել են, որ այդ թիվը 50 հազարի է հասել։
Ցուցարարները պահանջում են կառավարության և վարչապետի հրաժարականը, ինչպես նաև դեմ են հանդես գալիս «Վրացական երազանք» իշխող կոալիցիայի հիմնադիր Բիձինա Իվանաշվիլու գործողություններին, ով, ինչպես նշում է ընդդիմությունը, շարունակում է կառավարել երկիրը հետնաբեմից։ Ակցիայի մասնակիցները ձեռքում պահում են «Կառավարություն, հրաժարական տուր», «Բիձինա հեռացիր» և «Վրաստանն աղքատացել է» գրառումներով պաստառներ։
Կարգուկանոն պահպանելու համար դեպքի վայրում են գտնվում իրավապահ մարմինների աշխատակիցները։
